اليوم ياقافي انا وياك ناوين الرحيل
لديار امير ٍ ناقش اسمه للأبد فينا طلال
اليوم يومك والجمل منحور في رد الجميل
دام الجمايل بنت ياقافي ووالدها طلال
والله لو نحسب ونحسب ماحسبنا الا القليل
والله لو ننسى وننسى مانسينا يا طلال
انك على درب المراجل والنقا مالك مثيل
محبتك في قلوبنا تبقى بنا اعظم طلال
بطل وتبقى سيرتك في قلوبنا مثل النخيل
عالي ابد ماقد حنيت إلا لربك يا طلال
تاريحك المقرون بافعال النشاما والدليل
كل ٍ على موتك بكى وشلون مانبكي طلال
الخير بك ماله مدى مايعترف بالمستحيل
دايم دروب الخير دايم في تواصلها طلال
بالسر والا بالعلن ماترضى بالفعل الهزيل
امسى سمينك بالفعل سر وعلانية طلال
كل القوافي حالفة تخلد اسمك جيل جيل
لو جات في شتى القصايد جت قوافيها طلال
كلمات :
محمد بنيان
طلال يموت!!
يا حفار القبور أسألك بالله احفر بصدري
احن ابن الكرام من التراب يضم جثمانه
دخيلك نزله بين الضلوع العوج او تدري
تعال نمدده بالقلب جايز تركد احزانه
وربي مافجعني يوم علم ولا كسر ظهري
مثل علم الشجاع اللي توفى خارج اوطانه
وقفت أتأمل الدنيا بدونه وأكل بظفري
شعرت بوقتها كن الخفوق يعض شريانه
طلال يموت!!لاوالله احس العالم تهذري
طلال الشامخ الشاهق يموت!!الناس حلمانه
شقول لعيني ان شافت فواصل هاه وش عذري
وقالت فاصلة بيضاء محمد مالها خانة
وش اتعذر واقول لمسمعي لو سيرته تطري
وش اتعذر اذا سمعي حضن نبرات ديوانه
ياكيف انسى كلامه يوم جيته شايل ٍ شعري
سمع مني وصفق لي وقال بعضمة لسانه
لو ادري انك بتتعنا لنا جيناك من بدري
فواصل بيتك وعلق قصيدك فوق جدرانه
رفع من معنوياتي وخلا الدم بي يجري
بعد ماكنت يائس والمشاعر جد ضميانه
كتبت وصرت انافس كل شاعر من بني عصري
واذا الملتاع راهن شي عادي يكسب رهانه
انا الملتاع والله من فقدته والالم حصري
مثل طفل ٍ يتيم ٍ فوق ضيمة جاروا اخوانه
وش اذكر من صفاته؟فارس وفيه الكرم فطري
يمد ويصبح الطائي صبي من ضمن صبيانه
هدوئه يشعرك بأن الكلام بحضرته مغري
كلامه يشعرك بأن الهدوء ان طال له شانه
الا منه استقام طويق وان تكى هرم مصري
بعمره ماظلم انسان ولا زعل انسانه
ولكن حكمة الله قد قضت في آمره وآمري
قضاه يموت واتحسر بأمر الله سبحانه
دخيل الله يا حفار القبور تحطه بصدري
انا أولا فيه خلصني ترى الاخلاق تعبانه
كلمات :
محمد عويضة
ريح الفشق
لو الحزن دمع الله يحرم يباس الموق
على العين لين يغرق الجفن مجهاشة
ولو الوزن شمع اللي من كبودنا محروق
ينير الظلام بنجر الاضلاع مهباشه
على سلم جدانه يموت وجبينه فوق
لو ان الجدي يرقى على سهيل ما ناشه
وطيب لو ان المسك ما ارخصه عرض السوق
غدا من قواريره ومن طيب غراشه
طلال الرشيد اللي تجيه المنايا بوق
على صدق والموت الاسباب غشاشه
نصاه الرصاص ضيوف قلطهم المعلوق
وعشى ضيوفه مهجته رابط ٍ جاشه
يا ربع يهبا ريح الفشق وشكثر معشوق
تقل عيب احد من شمر يموت بفراشه
وهذا مهو بـ ايات احد يعجز الطاروق
يوفيه قدره لو هو السحر وادهاشه
امير التواضع والحيا والادب والذوق
والاخلاق ملفى كل طيب ومطراشه
سرى للنوايف - راس شمر - مهو مسبوق
تقل وحده الساري والانام غباشه
نعم ما يكبره " اللقب " يكبر المنطوق
بالافعال وعزوم الرجاجيل بطاشه
حثينا على وجه السحاب التراب حقوق
لو الله عفا منه اكرم الخلق ماحاشه
يارب اغفر لعبدك طلال الرشيد وسوق
له من البرد ما يهبج الروح رشراشه
وعسى ربي الله ونبيي محمد طوق
يوقي بها عن ظلمة القبر واوحاشه
بجاهك وبعزك وبجلالك ياربي عوق
عن النار جسم ٍ عل الاستبرق قماشه
يارب وعسى صحبته ابو بكر والفاروق
بقدرتك ياللي ترزق الطير باعشاشه
يارب وعسى اللي عندك من السعد مفهوق
له بكل عمر ماته ابن ادم وعاشه
كلمات :
فهد عافت
مرثية ابنة اخت الشاعر طلال الرشيد في خالها :-
قال تعالى "كل من عليها فان ويبقى وجه ربك ذو الجلال والاكرام"
ان القلب لايحزن وان العيد لتدمع وانا لفراقك ياابا نواف لمحزنون
طلال العبد العزيز سعود العبد العزيز المتعب الطلال الرشيد
لا اعلم من ارثي
أرثي طلال الشاعر
أرثي طلال الانسان
أرثي طلال الامير
أرثي طلال الخال
أم ارثي الدنيا ومن عليها
وهل للدنيا طعم عقب فراقك؟
رحلت صائما معتمرا معتكفا في ارض الله الطاهره
رحلت وتركت الناس يبكون ويجزعون
رحت والناس تبكي
رحلت والشعر يحكي
عن شجاعتك وفروسيتك وعظمتك ونبلك وشهامتك وعظمتك0
خالي طلال
الـحـروف عـقـام والـكـلـمـات سـٌقـام فـي رثـائـك
النفـوس مـفـجـوعـه والـقـلـوب مـوجـوعه في بكـائـك
خالي طلال
برحيك رحلت انا
ولم يبقى مني الا ذكرياتي معك
خالي طلال
أجـيئك مدججا بكل ابجديات الرثاء
التي سودت مراثينا
أجيئك بكل لغات الكون جماده وحيوانه وانسانه
ابكي على موتك كل البكاء
ابكيك كقبله عطر مامست جبين احد مثلك
قبلك ولا بعدك
أجيئك يافيئي ويامطري
باكيا منشدا
لمن تتبرج ساعات افراحنا؟
ياكل افراحنا وانسنا
ولمن نبتاع الدنيا
بعد رحيلك عنا؟
ولمن نكتب الشعر والقوافي
ياقائل الشعر فنا؟
أنبكيك... ام فيك
نبكي انفسنا؟
بغيابك النهائي
تغيب شموس نهارنا
واقمار ليلنا
وندى ثرانا
وخصب اوقاتنا
وبغيابك
تغلق الطرقات منافذها
وتفيض مياه انهارنا
وينهزم الصوت في صوتنا
برحيلك
ترحل البسمه
وتاتي الدمعه
ترحل العذوبه والنقاء والصفاء
وتحتوينا ملوحه الزمن المر
برحيلك
ترحل كل قوامس الحياه والبهجه
ويبقى لنا بؤس الحياه
لقد كبرنا على ذلك النداء الخالد "خالي"
هذه المفرده التي تربينا عليها منذالطفوله
لمن نقولها اليوم؟
غابت بغيابك
ورحلت برحيلك.
لقد كنت فاصله بيضاء وطاهره في حياتنا
.
مرثية مسفر الدوسري :-
هاهو مسفر الدوسري يتذكر طلال ويبكينـــا بحرقـــه.
لايابعد حيي تعال
بعدك جرح كثر الرجا قِـلّ الظلال
من بَعدك الشِيخـة شكت قلّ الرجــال
شف العذارى فرعن وارخن على الليل الرمال
طلال تعال
بعدك قصر عمر الفجر
وارتفعت الكف الشمال
لايـابـعـد حـيـي تـعـال
بعدك لقى ذيب المسا أيامنا البيضا غزال
لاياسند ظهر الفرح الملح سال
طلال تعال
ماليّل فبُعدك وصل لكن نبي وجهك هلال
بعدك صحيح تشابهوا ولا بقى ذاك اللي يحيي غيثها
لاجفّـت الـمـزنـه وعـذّبـهـا إبـتـهـال
ولا بقى منهو يعدّل ميلها لاقيل مال
بعدك طفا نور الحكي والاجوبه مابللّت ظما السؤال
بعدك رؤوس اينعت
بس مهرتك ماخانتك ولا تبي إلا الأمير إبن الأمير اللي ورث ورثه حلااااااااااااااااااال
رد ياطلااااال
ماعاد بقى في الحال حال
وصار السهل صعـب الـمنـال
ولا لقينا لهمّنا ساحل ، ولا لدموعنا المسفوحه جال
تكسّرت روس النصال على النصال
لا يابعد حيي تعال
مرت سنه
كل يوم أبخّر مجلسك
وأقهوي ضيوفك بعض علومك .. تنتشي خيول الفخر ويميـــل عقال
مرّت سنه
كل يوم اقول ابلتفت
والقاك بطولك تبتسم
واقف ولا طولك احد ، تدري بعد مارحت .ز أبد .. ماشئ طـــــــــال
إلا الحزن بعدك إلا من قال .. نال
مرّت سنه
وأناديلك : تعااااال
أحلّفك باللي رفع ظلّك سما
وابسط تفاصيلك خيال
باللي عطاك الطيب وزلّيته على معاميل الدلال
أحلّفك بالعِشرة واللي بيننا
وبنور يمينك لاإنعمى الدرب وطوى الليل الجبال
طلال تعـــــــــــال
أحلّفك بالله تعال
سافر ولكن لاتغيب
ولايجف بعدك كحل
ليلة وداعك لاوقف عوّد يسيل
سافر ولكن لاتغيب
ولاتعذّبه بالوله جيد وجديــل
أ وبالرحيل يظماك شال
طلااااااااااااااااال
لايابعد حيي تعال !!!
مرثية الشاعر عثمـــان صالح الضبعــان:-
ياطلال الطيب قلي وين دربــــك (ياطـــلال)
ياطلال الطيب وينك تكفى اســــمعني ابـيك
أسألك وينك وانا ادري وين اجابة هالسؤال
يرحمك مولاي ياللي بالغلا مــالك شريــك
يوم قالولي توفى قلت انا كــــــذب ومحــــال
لي ثلاث سنين وقلبي مايفكـــــر الا فــــيك
لي ثلاث سنين احاول افتح لحـــزني مجـــال
واكتب همومي بغيابك وانثر دموعي عليك
ااااه يالملتاع عقبك صال دمعي لك وجـــــال
وان نساك الدمع لحظه خاطري لا مانسيك
شاعرن لا شاف زولك قــــام يناديــلك تعــال
شاعرن من يوم صغره كل همــــه يلتقيــك
من كثر ماغليكْ اشوفك والتقيبـك بالخيــــال
كيف واكبر حلم عنـــدي قبــل لاترحل اجيك
ااااه لو اهديك عمري كل عمري لــك حــلال
ماأبي لو لحظه منه كــــل لحظــــه تفتـــديك
ليت يالملتاع تـــدري مابقلبـــي مــــن ذبــــال
كيف وانــتا لي سحابه ونبت قلبـي يرتجيــك
(في جنان الخلد يالله سكـن الغــالي (طـــلال)
مثله يستاهل ياربي تملكــه رحمـــة يديـــــك)
.
.
مرثية الشاعر : نواف نهير العلوي الشمري .
(صرخ برزان صرخ رمان صرخ سنمان ورماله)
صرخ برزان ... صرخ رمان ... صرخ سنمان ورمـاله
تكسَّر في أجـا العبـرات وسلمـى شقــت جـيـوبــه
صـدى صرخاتـهـم بالغيــم جتــك السح،ـب همَّـالـه
تهــل دمـوعهــا بالحــزن فــوق الضلــع م،صـبوبـه
صرخ ياطب .. وصاح إركان .. وصاح عصام وجباله
صرخت حـايل .. وحجلانــه يـاكــن الــدار مسلوبــه
صرخت صرخه .. صرخة نوره بعال الصـوت عِـزالــه
عسـى دار الجـزايــر فـي صبــاح الغـد مـقـلـوبــه
نعاك سعود .. والـنايب .. وقصــر الحكــم ورجالـه
تخيَّـل صدمــة المـوقــف تـقــول الــدار مضـروبــه
أمير الــدار يفقـد شيـخ وأغلـى غالــي أخـوالــه
يروح الشيخ بليا حرب .. ولا مقابــل .. ولا شـوبــه
سديــد الــراي بالأزمـات عضنفـر قـايــد قـتــالــه
ضياغــمٍ باللـَّقـا والعيـد عنــده سـاعــة حــروبــه
جنايز مـن جنايــز مـا مشــوا بـالغــدر وغـيـالــه
جنـايــز مومنيــنٍ بالـقـدر والكـتــب مـكـتــوبــه
عزانــا بالأمـيــر الشـمـري إخـــوانـــه وآلــــــه
أخـوه الضيغمـي (عبدالعزيـز) اليــوم شــدوبـــه
وعزانـا فيـك (نـواف) الـمضـفــر صـامــدٍ جــالــه
وفـي (عبدالعزيـز ) وبالضياغــم ضــد لاهـوبـــه
حــرار مــن حـرارٍ فـي ظـهــور الخيــل خيـالـــه
حـرار مـن حـرارٍ مـن جـبــل سنـجــار مـجـذوبــه
جــــزاك الله (يــاطــلال) بالجـنــات وإقــبــالــه
عسـاك بجنــة الفـردوس بأنعامــه ومشــروبــه
وحنــا فـي بــلاد الخـيــر دار الـعــود وعيـالــه
جـزاه عـن أمـة الأسـلام عفــوٍ يـغـفــر ذنـوبــه
وصـلاة الله لمحمـد إعـــداد النــفــد وسـهــالــه
رسول الحق في نشر الهـدى مـا أحـلاه بأسلوبـه
رســولٍ ينبــذ الإرهــاب مـا حـــبـه ولا قـــالــه
يقول إن البشر في ذبح مسلم في لظى والنار مشبوبه
.
.
مرثية : فايز البراهيم
لاتـعــزون شــمــر والـرشـيــد
عــزو الـكـون كـلـه فــي طــلال
عـزو الـعـز00 وحــروف القصـيـد
وعـزو الهيـل مــع صـفـر الــدلال
عـزوالـلـي لـفـزعـاتـه يــريــد
وعـزو اللـي شـكـاء ظـيـم اللـيـال
عــزو الخـيـل والحـلـم0 البـعـيـد
وعــزو الغـيـم00 عــزو هالخـيـال
عــزو اللـيـل وسـهـيـل البـعـيـد
وعـــزو ألارض كـلـهـا والـجـبـال
عــزو الـصـدق واخــلاق الشهـيـد
وعزوالـدمـع 0يــوم الـدمـع ســال
لاتـعــزون شــمــر والـرشـيــد
عـزو اللـي عـرف 00منهـو طــلال
وارث الـلـي لـهـم مـجـد(ن) تلـيـد
معتـلـيـن الـمـفـاخـر والـفـعــال
الجنـايـز هــل الـــراي الـسـديـد
مايـهـابـون مـــوت ولا قــتــال
آه وان قلـتـهـا مــابــه نـقـيــد
آه ويــلاه 00 مــن فـرقـى طــلال
أبــو نــواف 0 مـفـراص الحـديـد
كلـنـا مــن رحيـلـه فــي هـيــال
أبــو نــواف مـزبــان الـزهـيـد
مـن رحيلـه صــرخ كــل الشـمـال
أبــو نــواف0 وان قـلـنـا فـقـيـد
اشـهـد انــه0 فـقـيـده يـارجــال
لاتـعــزون شــمــر والـرشـيــد
عــزو الـكـون كـلـه فــي طــلال
ياخسارة شبابك...... ياأمير الطنايا =
ماكمل عيدنا .. لاصرت للعيد عيد
كيف اعزي النفوس ومابقى بي بقايا =
مافقدناك وانته للجنازه حفيد
كل من قال بابكي.. جت دموعه عرايا
= جت تعزيك فيك .. وصحت من هو الفقيد؟؟
البكا........ إنفعالات الحزن والنوايا
= والرثاء إنفعالات الشعر والقصيد
ول.... يالموت لامنك صعقت الحنايا
= بموت من كان أو مازال للطيب سيد
رحت.. والعيد من حزني رميته ورايا
= وانت ياشيخ عيدي وانت حزني الوحيد
جاني الموت.. يسأل.. منهو سيد عزايا؟؟ =
قلت ياقلب إصرخ... قل( طلال الرشيد)
الشاعر / جاسم سلمان
مات البياااض...
اللـــــــون الابيض انتهاء /قولوا اذا بانت سعاد =
فســتان عـــرسك لونه الابيض زمّنا ساحـــــبه
الـلــــــون الابيض انتهاء من صفحت الدنيا وباد =
ما باقي الا الوان من احزانها جت شاحـــــــبه
مات البياض ولابقى بعد البياض الا الســــــواد =
الله يسّود وجــــه من طــــــخ البياض وصاحبه
روّح ابن عبدالعزيز اللي بطــيب ايـــــديه ساد =
ننحب هــــنا وام الصغــــيرين اليـــتاما ناحبه
انا اشــــــهد ان الموت ياخذ الكريم من العباد =
ماهو عـــبث اخــــذ ابن عبدالعزيز وراح بـــه
اللي له القـــلب الرحـــيب اتعـــبته ايامه وعاد =
الا طــــلال بألــف قلب من القـــلوب الراحـــبه
حتى رصاص الغدر صاد اطهر على الدنيا فؤاد
= ثم انــتـــهاء عــمر البياض البارحه مع صاحبه
للشاعر / احمد السويلم
يارصاص الغدر يعني مالقيت الا طلال
= مالقيت الا الكريم الليّ تلبـّسه اكرمــه
الكريم اللي سبق غيره من ازحول الرجال
= الرفيع القدر ابو المدات ياالله ترحــمه
دمث الاخلاق بتواضع لافعل فعله يقال
= وكل فعلٍ فيه خير بخير فعله يدحمه
صيته استوطن شواهيق النجوم ابن الحلال
= فاق حد ادراك من يدخل حجاه ويزهمه
آه يقسيّ المواجـع وآه من غـدر اللـيال
= وياالآهـي بالصبر للي يحـبه تلهــمه
مات ابو نواف والدنيا نزولٍ وارتحال
= والليالي بعد موته موحشات ومهمه
فالزمان اللي تساوى به ظهوره والزوال
= الزمان اللي بياضه طاعنه دوم ادهـمه
العزا لكل القبايل والسناعيس بطلال
= فارس الشعر وفقيده مرتفع دوم اعلمه
للشاعر / متعب محمد الحشيان
اذرفي ياعين وادمع ياوريد
واحزني ياارض واركع ياحزن
يوم مات الحاتمي ابن الرشيد
مالنا كود التوجد يازمن
والله انك ياطلال اغلى فقيد
والله انك للوطن كنت الوطن
والله ان بموتتك مات القصيد
كلنا في موتتك صرنا كفن
والله ان بموتتك صرنا نجيد
الدموع اللي تثاقلها البدن
والله ان بموتتك قامت تزيد
من بكاها نجد تسمعها عدن
والله ان الخير عقبك مو سعيد
يذكر ايديك الكريمه لاعطن
والله انك كنت سيد ودمت سيد
ولايزال الخير يذكرك بحسن
يالشديد ابن الشديد ابن الشديد
يانصير ٍ للعباد بلا ثمن
صادك الموت الغبن وانته تصيد
والغبن انّا نموت من الغبن
لعنبو وقت ٍ ذبحنا من جديد
في زمان من التخلف والفتن
رحمة الله ياطلال ابن الرشيد
كلنا لك ياولد حاتم كفن
ببـدأ باسـم رب ٍ رحمنـا بالاسـلام
الواحد اللـي ماحـد ٍ غيـره ايـدوم
رب ٍ رحوم ٍ يامر ابوصل الارحـام
هـو العليـم وعالـم ابكـل العلـوم
يقـول منهـو نـام غيـره ولا نـام
سبت خبر مفجع حـرم منـه النـوم
خبر يهز الـراس لطـراف الاقـدام
اقلوب تبكي حـزن وتعانـق اهمـوم
بكت على بيض الورق كـل الاقـلام
والشعر يبكي من خبر واصل اليـوم
تبكـي الثوانـي والدقايـق والايـام
تبكي المراجل والمواقـف والاسلـوم
لحظه وصلني علم ٍ ايشـل الاجسـام
علم ٍ كبيـر ايقعـد ارجـال وتقـوم
جاني خبر موت الكريم ابن الاكـرام
موت الامير الشاعر ابغدر الارخـوم
انشهد ان حايل تبـي تبكـي اعـوام
تبكي رجل ... صيته علا فوق النجوم
طلال ابن رشيد ولـه كـل الانعـام
نسل المشايـخ والشجاعـه والقـروم
تبقا فعايلهـم مثـل وضـع الاهـرام
الكـل يعرفهـا ويحكـي بـهـا دوم
والعمر مهمـا طـال لاشـك مـادام
كل ٍ بهالدنيـا لـه المـوت ملـزوم
للشاعر فارس عفاس الدوسري
مرثيات قالوها في الامير الرااحل::..
ياوي ياعلمٍ لفارابع العيد
لاوالله الا العلم بالحليل كايد
من هولته فيناتشيب المواليد
ومن لوعته فينا تذوب الشدايد
هواجسٍ تغلي بنا حزن وتزيد
واناهواجيسي تهل وتزايد
تفوح فيني مثل فوح البغاديد
المركيات لحاميات الوقايد
قالوارحل قرم العيال الاواليد
طلال ياللي للمناعير قايد
ابن رشيد وفزت وصاحت البيد
وهتز كل نجمٍ عن الكون نايد
يبكي عليه العيدوالطيروالصيد
وهضاب نجدومترفات القصايد
وضلعان حايل والحزوم الجلاميد
وأهل الثقافه والصحف والجرايد
والخيل والسيف الحمروالبواريد
والهيل وسلوم العرب والعوايد
ويبكونه عيال الوفاوالاجاويد
وعليه صاحن لابسات القلايد
بالصيد راح بطلبتك راعي الصيد
شيخٍ لعسرات النواميس صايد
اهات وهمومٍ تزامى بتنهيد
بمحمد العايدتعدت لعايد
محمـــــــد العـــايد
واحـســـافـه والقـهـر والغـبـيـنــه 0000
مات البطل أبن البطل نسل الأبطال
لا والـذي عـلاك مـوتــك نـديـنـــه 0000
وشمر ترى تبكيك شيـبـــان وعيـــال
وحـائل تصيح صيـاح بيِّـح كـنينه
0000وسلمى وأجا تنّعى من الجــال للجــال
ومن شرق جبل سنجار لأطراف لـينـه 0000
ومنهو سكن ديرة ومن عـاش رحّــال
وكـل المـلا تبكي بـنفـس ِِحـزينــه 0000
يالضيغمي موتك (قـهـر كل رجّــــال)
المـــوت حـق وكـل نفـس بحينــه 0000
ولا نعترض حكمه على المال والحال
مار البلـى مـن مـات بأيـدي لعـيـنـه 0000
بغدر ماهو مقابل رجــال للـرجــــال
طـعـنـه ظهربالغـدر يزرع كـمـيـنـه 0000
ضحيته فــارس عن ألفيـــن خيّـــــال
لـو انـه أسـد لانـطـلـعـه مـن عريـنه 0000
ونذيقه من أفعاله على قـدر الأفعــال
وش حيله المغبــون وش فـي يـديـنـه 0000
لاصار مـن خانوه خاسيـن وانــــذال
تفرقـوا ولا بـان شـخــص بـعـيـنـه 0000
تـدسـسـوا مـابـيــن وديــان وجــبــال
يارب أبو نــــواف تجـعـل ضـنـيـنـه
0000 في جنّه الفردوس زيـنـات الأعـمــال
وتجعل له بقبره روضــــه حـسـيـنـه 0000
وتغسله من ذنوبه غسل وبل هطَّــــال
سعود فيحان السليطي الشمري
(( أميــر الطنايا ))
المقادير مامنها محال ومحيد
قدرة الله على الانسان مابه محال
الله اللي خلقنا وكلنا له عبيد
وكل نفس(ن) على الدنيا وراها الزوال
كل نفس(ن) تذوق الموت معلوم أكيد
لاكن الكارثه موتهزحول الرجال
آه ياعبرة(ن) فيني تعيد وتزيد
كل ماقلت ابسلا عودة بحتمال
لاتذكرت في ذهني طلال الرشيد
عفت دناياي كله دقها والجلال
رحمة الله على أمير الطنايا الفقيد
شيخ شمر الياركب الرشاء بالمحال
الخبر يوم جاني في طلال الرشيد
كيف ضاقت علي دنياي شرق وشمال
ليتنا فدوتلك وانت حي(ن) شديد
يافخر كل شمر ياكريم السبال
والله اني لخلد لك بيوت القصيد
وأطلبلك اليا صليت بالابتهال
يالله اني طلبتك ياحميد(ن) مجيد
لا تخيب رجايه ياعزيز الجلال
جعل شيخ الطنايا ابونواف عنك شهيد
سائلينك بعفوك يامجيب السؤال
وتجعل اللي غدربه في جهنم خليد
قولو آمين ياللي تسمعون المقال
الشاعر /
مظهور فايد المفضلي
ابو نواف حي وحتي لو هو فقيــد
ما يزيله حقود ... ولا سموم اغشما
قتل الاحرار نكسه في حياة العبيد
تقصــر أيدين من خطط ومن هو رما
طبعا الموت حق ... و منكتب للعبيـد
ما ترده سيوف ... ولا تــــــرده حما
بجنة الخلد جعلك يا "طـــلال الرشيـد "
اكــبر بعرضها من الارض ويا الســما
انت لو غبت باقي في عيون القصيد
دمع عين المشاعر من رحيلك هـــما
فيك حسن الخصال بكل يوم ٍ تـــزيد
وكل بحر ٍ طرقتـه مات بعــــدك ضما
جيت سامي بماضي كان قبلك مجيد
ورحت منا بحاضر من شموخك سـما
للشاعر / محسن الدويخ
بهذه الكلمات قدم الشاعر طلال العبدالله الرشيد لقصيدته
أم الخساير والتي رثى فيها الفقيد طلال العبدالعزيز الرشيد ..
. يقول :
يعني ما كفوك مليون الشهـيد
تاخذين أغلى الحبايب يالجزايـــــر
مالقيتي غيـر أطيـب الرشــــيد
لو ما اخاف الله لاقول الحكم جاير
الله اللي كاتـب وحنا عبيــــــــد
ذا قضا رب المسـاجد والمنايــــــر
الزمن لو طـال مثله ما يجيــــــد
فقد ابو نواف هي ام الخسايـــــــر
مدرستنا في المراجـل والقصيد
طيب الموقف الي دارت دوايــــــــر
" لا بكا ينفع ولا شكــوى تفيـد "
ما بيدنا شي لو الدم فايـــــــــــــر
ما بيدنا غير نصفــق ايد بيـــــــد
ومن تكلم عنه تخنقنا العبايـــــــــر
ما بقى فينا على الشدة شديد
اللهب بين الضلوع وفي الضمايــــر
كيف نفرح عقبه بعام جديــــــــد
لا هــلا ولا مسهــلا بواحد ينايــــر
يالله انك تحسبه عندك شهيـــد
من توفى غدر في بر الجزايـــــــــر
طلال الرشيد....والقصه كامله
الجزيـره اعلنـت قبـل احـدٍ يعلـمـي
اعلنت اسوى خبر هـز شمـر والاعبـاد
اعلنت موتت طـلال الرشيـد الضيغمـي
وحزنت كل (الطنايا) على روحـه احـداد
والحزن بقلـوب شمـر عروقـه تندمـي
والبسن بنات شمـر ثيـابٍ مـن سـواد
جعل عينٍ ماذرفت لـه دموعـه تنعمـي
وياعيون الحزن هلـي دموعـك أزديـاد
وانعي الشيخ الشريف الشهيـد المسلمـي
الرحـوم الوالدينـه يـواصـل بالعـيـاد
وياجبال اجـاء وسلمـى حنـي وارزمـي
شاعرك ودع وبعده عليـك الحـزن سـاد
وياليتيمـه يالعظيمـه يـادار الاكـرمـي
هـذي الدنيـا تفـرق ومافيهـا يـبـاد
ياعروسه البسي الثوب الاسـود واعلمـي
مابقا لك غير اسمـك وسيفـك والجـواد
انعي الشيخ الاميـر احلمـي .. لاتحلمـي!!
وقولي ابقى بعهد جدك يوم انـي بالمهـاد
وكم وصف بك شاعرك مثل وصف الاسلمي
وكم تمنى شوفتك مـات ماركـب الشـداد
راح شيـخ القـوم ماكـن غيـره ادمـي
وفقدت شمر من شيوخهـا رجـلٍ إسنـاد
الشجاعه وسـط راسـه تزيـد ويرتمـي
مكرم الضيفان لاجوه مـن جـوده يجـاد
والتواضع من صفاتـه ورايـه محكمـي
حايزٍ كـل المراجـل ولـه رايـنٍ سـداد
وبثقافـه والأدب كـن معـه امترجـمـي
وبشعر دكتور شعره مثـل زرع الحصـاد
مات (طـلال الرشيـد) أغتيالـه بالرمـي
من فعل (الارهاب) واهل التطرف والفساد
من صهاينة (الجزائـر) بلليـلٍ اضلمـي
اذبحوه اهل (الغدر) ولعـو فيـه الزنـاد
(شيخنا) مايروح دمـه هـدر لايحرمـي!!
(يحرم) الفنجال شربـه ولا حلـو الرقـاد
ثار (ابو نـواف) شمـر ابدمـه تلزمـي
ياالسناعيس (الطنايـا) عليكـم بالجهـاد
ثار شمر ب(الجزائر) لـو انـه بالحمـي
مايكفي نصهم لو حصدناهـم (حصـاد)!!
ماعرفو نسل الجنازه (طـلال الاعصمـي)
كان ماتو ألف مـره ولا (غـدر) الهجـاد
ومايضيـع الحـق والله يـذل المجرمـي
ويا(طلال) الميـت الحـي تبقـى بالفـؤاد
والبقيـه فـي عيالـه وبسمـه تستمـي
والامل فيهم عسى ايامهـم دايـم اجـداد
وفي ذراء (آل سعود) حنا ابحماهم نحتمي
حكم وأحد شعب وأحـد ولا فينـا انفـراد
وبالوفاء ألامير (سلطان) جعلـه يسلمـي
الوزير اللـي بـذل لجلهـم كـل العتـاد
والأمير (عبدالعزيز) ابن فهـد الاشهمـي
دون (طلال الرشيد) وقفته تبـري الاكبـاد
ماكتب ربي علـى العبـد شـيٍ مقسمـي
والقـدر ماعنـه فـره ولا عنـه انحيـاد
واطلب المولى العزيـز الاإلـه الاعظمـي
ب(جنة الفردوس) مثـواه يـارب العبـاد
الـــــشــــــاعــــــر:
مــاجــد مــطــر الـشـمــري
أظلمت رفحاء وصاحت من طعون الغدر حايل= واكهفت شمس الرياض وغيمت نجد العذيه
غاب نجم وساد حزن وضاقت شعوب وقبايل=وابتدا ليلٍ طويلٍ يفقد الساري خويه
مالقيت الا الهموم وطافت عيوني تخايل=مامعاي الا هجوسي تصطفق روحه وجيه
انطوى حزني بقلبي لين دنيت المثايل=جمرةِ ذابت دموع وجمرةِ بالقلب حيه
آه واكبر الفقيدة آه وآكبر الغلايل= آهتين تجرهن آه آه وآكبر الضحيه
مافقدنا الا طلال اللي على الهامات طايل=ولا بقا غير السراب اللي زما بالمهمهيه
من يعزينا بابو نواف كساب الجمايل= من يعزينا بابو نواف نوماس الحميه
ضيغميِ عاشقِ للمجد من روس الحمايل= واعساه بجنة الفردوس يارب البريه
محمــــد العايد
